ԻՆՉՊԵ՞Ս ՆՈՐ ԼԵԶՈՒՆԵՐ ՍՈՎՈՐԵԼ. ԽՈՐՀՈՒՐԴՆԵՐ ՊՈԼԻԳԼՈՏԻՑ

Հունգարացի հայտնի թարգմանչուհի Կատո Լոմբն աշխարհի առաջին սինխրոն թարգմանիչներից մեկն է, և նա վստահ է. չկա «ես չեմ կարող» հասկացություն, կա միայն «ես ծույլ անբանի մեկն եմ» հասկացությունը:

Կատո Լոմբը գիտեր 16 լեզու, թեև մասնագիտությամբ քիմիկոս և ֆիզիկոս էր: Հաշվի առնենք նաև այն, որ Կատոյի ժամանակ չկային արագացված դասընթացներ, լեզուն օնլայն սովորելու տարբերակներ, Skype-ի միջոցով պարապմունքներ և այլն:

Տասնյակ լեզուներ ինքնուրույն սովորելուց հետո թարգմանիչը «Ինչպես եմ ես ուսումնասիրում լեզուներ» գրքում ներկայացրել է լեզու սովորելու իր մեթոդը: Ամենակարևոր սկզբունքը օտար լեզվի աշխարհում ամբողջությամբ խորասուզվելն է: Ինչպես նաև շատ կարևոր է զուգահեռ սովորել քերականությունը, կարդալ տվյալ լեզվով գրականություն ու սովորել դարձվածքներ, որոնք այդ լեզվում շատ են օգտագործվում:

Ահա Կատո Լոմբի տասը խորհուրդները նրանց, ովքեր նույնպես ուզում են շատ լեզուներ սովորել:

1. Լեզուն պետք է ուսումնասիրել ամեն օր: Եթե ընդհանրապես ժամանակ չկա, գոնե տասը րոպե, այնուամենայնիվ, պետք է տրամադրել դրան: Հատկապես արդյունավետ է լեզու սովորել առավոտյան:

2. Եթե սովորելու ցանկությունը շատ արագ է «թուլանում ու անցնում», պետք չէ արգելակել, բայց պետք չէ նաև ստիպել շատ արագ սովորել ու ընկալել: Պետք է ընտրել մեկ այլ մոտեցում տվյալ պահի համար: Կարելի է փակել գրքերն ու ռադիո լսել, վարժությունների փոխարեն բառարանը թերթել:

3. Երբեք անգիր մի՛ արեք, կոնտեքստից դուրս ոչինչ մի՛ սովորեք:

4. Դասերին զուգահեռ սովորեք պատրաստի արտահայտություններ, որոնք շատ դեպքերում ու իրավիճակներում պետք կգան:

5. Փորձեք մտքում թարգմանել այն ամենն, ինչ հնարավոր է. սկսեք գովազդային հոլովակներից ու վահանակներից, ավարտեք պատահաբար լսված խոսակցություններով: Հոգնած ուղեղի համար սա լավ ու հանգստացնող վարժություն է:

6. Հաստատուն ու հիմավոր պետք է սովորել միայն այն, ինչը հաստատել է դասախոսը: Սեփական սխալների ուղղումները անգիր մի արեք: Ուղղված տեքստը սովորելուց հաճախ սովորում ենք ու հիշում նաև սխալները: Եթե լեզու սովորում եք առանց դասախոսի, սովորեք միայն դասագրքային ճշմարտությունները:

7. Պատրաստի արտահայտությունները, դարձվածքները պետք է սովորել եզակի թվի առաջին դեմքով. Օրինակ` «I am only pulling your leg» (ես միայն գժվեցնում եմ քեզ):

8. Օտար լեզուն ամրոց է, որը պետք է գրավել բոլոր կողմերից և միաժամանակ` թերթ կարդալով, ռադիո լսելով, չթարգմանված ֆիլմեր դիտելով, օտար լեզվով ելույթներ ու դասախոսություններ լսելով, դասագրքերն ընթերցելով, գրավոր շփվելով, հանդիպումներով ու լեզուն իմացողների հետ խոսելով:

9. Մի՛ վախեցեք խոսել ու սխալվել: Խնդրեք, որ ուղղեն: Եվ, ամենակարևորը, պետք չէ վհատվել, վիրավորվել ու նեղանալ, երբ ուղղում են ու ասում, որ սխալ եք խոսում:

10. Վստա՛հ եղեք, որ ինչ էլ լինի, հասնելու եք նպատակին: Դուք ունեք չընկճվող կամք, անհավանական հնարավորություններ ու լեզու սովորելու ունակություններ:

Կատոյի բանաձևը

Ծախսված ժամանակ + Հետաքրքրություն = Արդյունք
կամ
Ծախսված ժամանակ + Սխալ անելու վախ = Արդյունք

Աղբյուր